О началѣ козаковъ
. В лѣто 7024. 1516. Жигмонтъ, король Полский, хотя миру зъ Москвою, проси кесаря нѣмецкого, да его зъ княземъ московскимъ помиритъ; но не може зъ гордымъ и упорнымъ. Король же нача готовитися на брань, посла же по Миндикерея, царя Татарского, да пойдетъ с нимъ на Москву. Но онъ, лукавый сый, и от короля, и от князя дары бираше и обѣма помогати обѣщашеся. Король же, аще и не довѣряше сему псу, но единаче мышляше, аще и восхощетъ что шкодити нѣкоимъ загономъ въ нашой землѣ, то имутъ наши отстрашити ихъ из землѣ. И извѣсти своихъ, да стерегутся Татаръ: въсею силою бо имѣлъ татаринъ пойти въ его землю. Якоже и сотвори окаянный Миндикерей, иже посла чотырохъ цариковъ со четыредесят тысячей Татаръ, и положишася у Бузъска, а загоны по Волыню и Подолю распустиша, везъдѣ огнемъ и мечемъ пусту дѣющей землю, и отведоша самыхъ людей въ плѣнь около пятдесятъ тысячей кромѣ инаго товару и проч. Собрася на нихъ нѣчто нашихъ, но не смѣяше на такое множество покуситися. В сие лѣто начашася на Украйнѣ
козаки
, о них же откуду и како начало свое прияша нѣчто речемъ: «Аще и от начала своего
сей нашъ народъ руский
бранми всегда употребляшеся, и отъисперва в нихъ сие художество бѣ, оружие и брани, якоже вышше пространнѣе речеся въ главѣ той, откуду изыйде народ словенский. Посемъ, егда начаша князи быти, наста въ них лучшее строение и обычаи приятнѣйшыи въ землѣ нашой. Но единаче
сей народ нашъ бранилюбный
не преста строити брани, аще не со околными народы, си есть Греки, а потом Половци, Печенѣги, то сами межи собою, якоже в семъ лѣтописци естъ видѣти, донелѣ же през Батиа, татарского царя, иже землю нашу Рускую пусту сотвори, а
народ нашъ
умали и смири, к сему же еще и от Ляхов, и Литвы, и Москвы, такожде и междособными бранми зѣло озлобленны и умаленны быша, а потом и князи в нихъ оскудѣша; тогда
сей нашъ народ
мало упокойся. В лѣто же вышейреченное, егда король забавляшеся зъ Москвою, а Миндикерей поплѣни землю нашу, якоже о том вышей, посла Жигмонтъ король посла ко Миндикерею, глаголя: «Почто, мир имѣя со мною, поплѣнил еси мою землю?» Миндикерей же отвѣща: «Кромѣ моея воля се безъчинницы нѣкия сотвориша, ихъ же азъ не могохъ возстягнути». Жигмонтъ король, хотя ему сей смѣхъ отдати, посла Прецлава Лянцкорунского на Украйну собрати люду и такожде Татаром пакостити. Онъ же, собравъ охотниковъ съкилка сотъ, пойде с ними аже под Бѣлагородъ и тамо забра множество товара и коней, и овец татарскихъ и турецкихъ, и возвратися с ними. Татаре же и Турции, собравъшеся, гониша по них и постигоша ихъ аже подъ Очаковомъ у Овидова озера, и бишася с ними. Но наши поразиша ихъ и со великим добытиемъ [во здравии возвратишася]. И потом
бранилюбивый сей народ
, засмаковавъши себѣ зъ добычъ, наставиша себе старѣйшину зъпосредѣ себе, нарицаемого Козака, от него же и сами потом
козаками
нарекошася. И начаша сами часто въ Татарскую землю ходити и оттуду многия добытия приносити, день же от дне примножашеся ихъ множество, иже по времени умножишася, и даже доселѣ не престаютъ пакости творити Татаром и Туркомъ. А старѣйшину себѣ изъбирают спосредѣ себе, мужа храбра и смысленна, по своему древнему обычаю. Живутъ же въсегда на Запорожю, рыбы ловяще, их же безъ соли на солнцу сушатъ, а на зиму расходятся кождо во свой град, толъко зъ килка сотъ оставляютъ на куренѣ стрещи стрѣлбы и чолъновъ, а на лѣто паки собираютъся. И симъ образомъ
козаки
начало свое прияша. В сие лѣто посвященъ бысть Иона Минский на митрополию Киевскую от патриарха Пахомия.
Полное собрание русских летописей: Т. 40: Густынская летопись. СПб.: Дмитрий Буланин, 2003. С. 147‒148.
Страниц: 
Белорусцы (1620‒1655 гг.) (Прочитано 327820 раз)